HSTORIA E RADIO MARISË:
   Si filloi Radio Maria ne Shqiperi

  Historia e Radio Marisë në Shqipëri filloi në vitin 1995 kur Zotëri Emanuele Ferrario kërkoi mënyrat për të bërë të mundur dëgjimin e Radio Marisë në gjuhën Italiane në këtë vend. Kjo gjë u bë e mundur në vitin 1998 në disa pjesë të Shqipërisë, në Shkodër, në Tiranë dhe në Elbasan. Në të njëjtin vit filluan edhe kontaktet e para për hapjen e Radio Marisë në gjuhën shqipe gjë që për arsye të ndryshme do të realizohej vetëm me 19.07.2003 kur filluan transmetimet e para në Shkodër me rrethinë.

Që nga kjo ditë për herë të parë në popullin shqiptar u hap një Radio e cila mori përsipër edukimin fetaro-kulturor të këtij populli të shumëvuajtur gjatë shekujve të kaluar. Veprimtaria e Radio Marisë ka për bazë përhapjen e Fjalës së Hyjit dhe shpalljen e mësimit të Kishës. Ne për moto të Radio Marisë në Shqipëri kemi zgjedhur thënien: Hiri i Hyjit në shtëpinë tënde. Kjo Radio është pjesë e Familjes Botërore të Radio Marisë duke ruajtur dhe duke përhapur karizmën të cilën Hyji ia dhuroi botës prej Radio Marisë së parë që është Radio Maria në Itali.

Duhet thënë se kjo Radio u tregua si Radio e dëgjuesve, të cilët e pranuan jo vetëm me dashuri të madhe, por e pranuan si një dhuratë të cilën Hyji iu dhuroi. Dashuria e tyre u dha kurajo të rinjve që të punojnë pa u lodhur në të gjitha programet përmes të cilave Hyji ua dhuroi frymëzimet e veta. Të gjitha punët që nga fillimi përsa iu përket programeve bëhen me dashuri dhe në mënyrë vullnetare, sepse ata besojnë në këtë projekt të cilin Hyji përmes Marisë po ia jep popullit tonë.

I pari që e kërkoi dhe besoi në realizimin e këtij projekti hyjnor ishte Arqipeshkvi Metropolit i Shkodër-Pult Mons. Angelo Massafra i cili me këmbënguljen e vet kërkoi që Radio Maria të bëhet realitet në Shqipëri duke vënë në shërbim të plotë të Radios meshtarin Don Prenkë Lazraj. Prania e tij e shpeshtë në emisionet e Radio Marisë tregon mbështetjen dhe mirënjohjen të cilën ai e ka për misionin të cilin Hyji ia besoi Radio Marisë në popullin shqiptar.

Zëri i parë nga Radio Maria në Shqipëri u transmetua më 19 korrik 2003 në frekuencën 102.2 MHz. Ky ishte fillimi i cili shënoi hapat e parë në Shkodër, Dukagjin, Pukë, Kukës, Tropojë, Podgoricë, Ulqin me rrethina. Që nga 20 dhjetori i vitit 2004 fitoi edhe dy frekuenca të tjera 91.4 MHz dhe filloi të transmetojë në Tiranë, Durrës, Kavajë, Peqin Rrogozhinë dhe në frekuencën  89.6 MHz në Lezhë, Laç. Mamurras, Mirditë me rrethina me shpresë që shumë shpejt të bëhet Radio kombëtare në mbarë Shqipërinë.

Radio Maria nuk është radio komerciale, në të nuk zhvillohet asnjë aktivitet fitimprurës. Ajo varet plotësisht nga dhurimet vullnetare të dëgjuesve të saj të cilët na i dhuron pandërprerë Provania e Hyjit. Këtu vullnetarët tanë me dashuri ndajnë secilën ditë me të gjithë dëgjuesit Fjalën e Hyjit. Ata besojnë fuqishëm në këtë projekt hyjnor, pjesë të të cilit i bëri dashuria të cilën secili prej tyre e ushqen në zemrën e tij për Nënën e Jezusit dhe Nënën tonë, Zojen e Bekuar, në mbrojtje të se cilës jemi të gjithë.

Ndërmjetësimi dhe bekimi të cilin ajo na dhuron neve dhe dëgjuesve le të na ndihmojë që së bashku të udhëtojmë sipas shembullit të saj në kryerje të përditshme të vullnetit të Hyjit.